Prokuroria Themelore Publike e Maqedonisë ka publikuar një deklaratë në të cilën jep detaje për incidentin në afërsi të qendrës tregtare “Çairçanka”, ku një tifoz bullgar është therur me thikë.
Sipas informacioneve të PTHP-së, gjithçka ka nisur kur tifozët e Levskit, teksa lëviznin nëpër lagjen Çair me dy vetura me targa bullgare, janë konfliktuar verbalisht me kalimtarët dhe qytetarët.
“Tifozët bullgarë kanë ndaluar automjetet dhe kanë zbritur prej tyre, pas së cilës mosmarrëveshja verbale është shndërruar në përleshje fizike me një grup qytetarësh që kanë dalë nga objektet përreth. Gjatë kthimit në makinë, një shtetas bullgar 29-vjeçar ka mbetur i plagosur. 29 vjeçari ka pësuar lëndime të rënda trupore dhe është shtruar në spital. Pas një ndërhyrjeje kirurgjikale, i plagosuri ndodhet në gjendje stabile”, shkruhet në njoftimin e PTHP-së.
Nga PTHP thonë se do të ndërmerren të gjitha hapat për përcaktimin e identitetit të personave të përfshirë në ngjarje. Shtojnë se nga vendi i ngjarjes janë marrë gjurmët e gishtave, të cilat janë objekt i analizës mjeko-ligjore, si dhe u janë vënë në dispozicion edhe video incizimet, të cilat duhet të lehtësojnë hetimin e rastit.
