Praktika tregon se koha nuk funksionon në favorin tonë kur jemi jashtë procesit. Sa më gjatë të presim, do të hapen gjithnjë e më shumë çështje, të cilat vetëm sa do ta komplikojnë procesin dhe do të forcojnë pozitën e Bullgarisë.
“Marrëveshja nuk është bërë sipas “diktatit bullgar”, përkundrazi, ne kemi arritur një marrëveshje me të cilën kemi nxjerrë maksimumin dhe kemi negociuar në favorin tonë, me të cilën kemi arritur t’i vendosim në një kornizë kërkesat dhe obligimet e të dyja palëve, edhe maqedonase dhe bullgare”, thotë ai.
Ai shton se korniza jonë e negociatave e mbron gjuhën dhe identitetin maqedonas, me të cilin, thotë ai, arritëm që çështjet bullgare të mos bëhen evropiane dhe të mos e vënë në pikëpyetje të ardhmen evropiane të Maqedonisë së Veriut.
Ai është i vendosur se nuk do të ketë kornizë më të mirë. “E gjithë BE-ja na e thotë këtë, ne e dimë vetë dhe kushdo që thotë të kundërtën nuk dëshiron ta shohë vendin tonë në BE. Marrëveshja më e mirë se ajo që kemi nuk mund të arrihet, me këtë jemi në një pozitë të favorshme nga e cila lehtë dhe pa dhimbje mund të vihen në pah interesat tona kombëtare dhe të garantohet perspektiva evropiane”, thekson Mariçiq.
Ai thotë se nuk mund të ketë rinegocim të kornizës që është rënë dakord dhe miratuar vitin e kaluar në Konferencën e parë Ndërqeveritare dhe ne nuk mund ta ndryshojmë atë.
“Edhe sikur të imagjinojmë se është e mundur, nuk do të jetë më mirë se kjo, sepse as atmosfera dhe as rrethanat nuk janë të njëjta tani dhe kërkesat e Bullgarisë sigurisht që nuk do të jenë të njëjta. Duhet të jemi të sinqertë dhe realistë se nuk kemi zgjidhje tjetër veç kësaj, e cila na lejon të realizojmë detyrimet e marra mbi baza reciproke, me mirëkuptim reciprok, tolerancë dhe kompromise të arsyeshme, të cilat nuk cenojnë historinë dhe tiparet tona identitare”, thotë zëvendëskryeministri.
