– Operacioni në Manastirin Banjska të Zveçanit, është goditja fatale që iu dha segmenteve proruse në Shërbimin e inteligjencës serbiane (BIA), duke i rrjedhë informacione tek shërbimet aleate të Kosovës. Kjo âsht fitore spektakulare e NATO-s kundrejt Rusisë, në rrafshin informativ. Sëkëndejmi edhe e Kosovës kundrejt Serbisë.
Halil Matoshi, shkrimtar, gazetar, publicist e analist politik, njihet si emër që nga koha kur punonte në revistën rinore “Zëri i Rinisë”, në vitet më dramatike të shoqërisë së atëhershme jugosllave. Revistat rinore atëbotë, pra viteve 90-ta, ishin shtysa e ndryshimeve nga një sistem monist në atë pluralist, por që për Kosovën ishin edhe më shumë se në planin ideologjik, ishin vite të lëvizjes për statusin e saj të barabartë, që për fat të keq, jo që nuk shënoi progres, por shkoi prapa nën regjimin e Millosheviqit. Halil Matoshi ato vite ishte ndër zërat e fortë me plejadën e gazetarëve të shtypit rinor, si prijatarë të çështjes kombëtare. Gjithnjë i kyçur në lëvizje, edhe pas çlirimit nga regjimi serb, Matoshi vazhdon të japë kontributin e tij intelektual, duke qenë një zë kritik e kreativ në ndërtimin e shtetit të Kosovës.
Në këtë intervistë të shkurtër enkas për indeks.mk, ai i komenton ngjarjet më të fundit në Banjskë të Kosovës, ku doli sheshazi një agjendë destabilizuese, që për fat u hetua me kohë dhe u menaxhua mirë nga policia e Kosovës. Por, ky është vetëm njëri aspekt i problemit…
– Dje ishte një ditë dramatike dhe tronditëse për Kosovën pas vrasjes së policit Afrim Bunjakut në fshatin Banjskë…A ishte kjo ngjarje një kthesë në betejën e Kosovës për të vërtetën e saj kundrejt Serbisë, e cila me involvimin e saj ka humbur shumë kundrejt bashkësisë ndërkombëtare?
– E vërteta e Kosovës dihet. Është mbështetur më 1990-tën dhe më 1999-tën. Por kjo ngjarje duhet te kundrohet si kthesë në luftën hibride të Rusisë në rajon që e realizonte përmes satelitit të saj, Serbisë. Shthurje totale e inteligjencës serbiane! Operacioni në Manastirin Banjska të Zveçanit, është goditja fatale që iu dha segmenteve proruse në shërbimin e inteligjencës serbiane (BIA) duke i rrjedhë informacione tek shërbimet aleate të Kosovës. Kjo âsht fitore spektakulare e NATO-s kundrejt Rusisë, në rrafshin informativ. Sëkëndejmi edhe e Kosovës kundrejt Serbisë.
-Si i shikoni të vërtetat që për të njëjtën ngjarje u plasuan nga kryeministri i Kosovës, Kurti dhe presidenti serb, Vuçiq?
– Aleksandar Vuçiq-it para syve iu thërrmua strategjia e inkursionit në Kosovë, përmes luftës hibride, duke kamuflu përfshirjen direkte, kinse mbas një rebelimi të serbëve lokalë, në veri të Kosovës. Ai më s’di çka flet! Është demaskuar fuqishëm edhe roli i Kishës Ortodokse Serbiane në Kosovë, me gjithë distancimin e saj, që erdhi si pasojë e dështimit ushtarak! I dërmuar dhe humbës (edhe me terma ushtarakë), ai nuk ka më asnjë justifikim para Perëndimit që investonte resurse ta ndihmonte të dilte me ftyrë nga kthetrat putiniste.
-Vlerësim i përgjithshëm është se policia e Kosovës tregoi profesionalizëm të lartë në zbulimin dhe rrethimin e grupit të armatosur serb. Sa kjo do t’i shërbejë normalizimit të gjendjes më tutje?
– Në Banjska është shënuar fillimi i fundit të ndikimit rus në rajon dhe fillimi i dështimit përfundimtar të destabilizimit të Kosovës. Porse, përleshja e dy qytetnimeve dje, duhet me u shërby për këndellje politikanëve në Prishtinë, se pa ShBA-të dhe NATO-n, asnjë betejë nuk fitohet. Aq më pak beteja politike për integrimin e veriut. Tashti çdo gjë është e qartë. Serbia është dekonspiruar, kurse Kosova duhet shpejt e guximshëm të bëjë veprime politike në drejtim të njohjes së të drejtës ahtisaariane serbëve kosovarë, që Kosova e ka obligim ndërkombëtar nga viti 2015. Sepse të drejtat shtesë për ta, Kosova i ka pranuar në këmbim të pavarësisë kombëtare.
-Pas ngjarjes, kemi dy qasje: një, se dialogu midis Kosovës dhe Serbisë ka vdekur dhe dy, qasja e Llajçakut, që dialogu të vazhdojë sa më shpejtë? Çfarë pritni se do të ndodhë me dialogun?
– Dialogu dhe zbatimi i Marrëveshjeve të Brukselit (dhe sekuentimi i Ohrit), janë interesa vitale kombëtare të Kosovës. Pozita e Kurtit në dialog nuk ndryshon, sepse negocimi ka rezultuar tashmë në Marrëveshje. Çdo jetë njerëzore e humbur tash do të jetë absurditet, sepse palët janë dakorduar, porse kundërshtitë po i bëjnë për përdorim të brendshëm. Me i ushqy’ turmat.
-A janë më të forta tash pozitat e kryeministrit Kurti në tavolinën e bisedimeve, duke pasur parasysh se gjithë bashkësia ndërkombëtare akuzoi grupin serb, që drejtpërdrejtë ose tërthorazi, si përgjegjësi i shkon Vuçiqit, i cili në konferencën e djeshme tha se prej kohësh ka paralajmëruar se do të ndodhte diçka e tillë?
-Vuçiq është i humbur, por kjo nuk i jep Kurtit asnjë kredi politike blanko, sepse ka detyrime në agjendën shtetërore. Dhe vetë ka marrë detyrime në Bruksel e Ohër./indeks.mk/
Foto: Leutrim Lika
